கிரிக்கெட் வீரர்கள் சிறந்த நடனக்காரர்களாக இருப்பது ஏன்?

பிபிசியில் Strictly Come Dancing என்ற நிகழ்ச்சி 4 வருடங்களாக நடந்து வருகிறது. இந்நிகழ்ச்சியில் பிரபலங்கள் ப்ரொஃபஷனல் நடனக்காரர்களோடு ஜோடி சேர்ந்து ஒவ்வொரு சனிக்கிழமை மாலையும் நேரடி ஒளிபரப்பில் வெவ்வேறுவிதமான நடனங்களை அரங்கேற்றுவார்கள். சம்பா, சாச்சாச்சா, அமெரிக்கன் ஸ்மூதி, குயிக் ஸ்டெப், ஜைவ், டாங்கோ - இப்படி பலவித மேற்கத்திய நடனங்களையும் குறுகிய காலத்தில் கற்றுக் கொள்வதென்பது எளிதல்ல. ஒவ்வொருவாரமும் ஒரு பிரபலம் நடுவர்களின் மதிப்பெண் மற்றும் பார்வையாளர்களின் வாக்கெடுப்பின் மூலம் வெளியேற்றப்படுவார். கடைசிவரை நீடித்திருப்பவர் டான்ஸிங் சாம்பியன் பட்டத்தைக் கைப்பற்றுவார்.

சென்ற தொடரை வென்றவர் இங்கிலாந்து பௌலர் Darren Gough. இந்த சீரிஸின் ஹாட் ஃபேவரிட் மார்க் ராம்பிரகாஷ். இவரின் வெட்கம் கலந்த புன்னகைக்கு ஏகப்பட்ட பெண் ரசிகைகள் - நடுவர் ஆர்லீன் ஃபிலிப்ஸ் உட்பட!

இன்னும் ஐந்து பிரபலங்களே எஞ்சியுள்ள நிலையில் சென்ற வாரம் அதிகபட்ச மதிப்பெண்களைப் பெற்று மார்க் எதிர்பார்ப்பை இன்னும் அதிகப்படுத்தியிருக்கிறார்.

ஏன் கிரிக்கெட் வீரர்கள் நல்ல நடனக்காரர்களாக இருக்கிறார்கள் என்று பிபிசி ஒரு கட்டுரை வெளியிட்டிருக்கிறது. கிரிக்கெட்டில் ஃபிட்னெஸ், டெக்னிக் மற்றும் ஃபுட் வொர்க்கில் இவர்கள் அதிகம் கவனம் செலுத்துவதால் நடனத்திலும் அது இயல்பாக அமைந்துவிடுகிறது என்கிறது இந்தக் கட்டுரை.

ஆனாலும் சென்ற வாரம் அதிகம் நெருக்கம் காட்ட வேண்டிய ரம்பா (Rumba) நடனத்தில் மனிதர் மிகவும் திணறிவிட்டார்!
இந்த வார Viennese Waltz நடனத்தில் 36/40 மதிப்பெண்களுடன் மீண்டும் முதலிடம் பெற்று ரசிகர்களின் மனதில் பால்வார்த்து விட்டார்.

"என் இயல்புக்கு இந்த நிகழ்ச்சி சரிப்பட்டு வராது என்றே எண்ணியிருந்தேன். திறந்த மனமிருந்தால் எதனையும் கற்றுக் கொள்ளலாம் என இந்நிகழ்ச்சி எனக்கு உணர்த்தி இருக்கிறது" என்கிறார் மார்க்

வாய்ப்பு இருப்பவர்கள் பிபிசி தொலைக்காட்சியில் சனிக்கிழமை மாலை 6 மணிவாக்கில் நிகழ்ச்சியைப் பாருங்கள். வாய்ப்பில்லாதவர்கள், அனைத்து நடனங்களையும் இந்த சுட்டியில் காணலாம்:

http://www.bbc.co.uk/strictlycomedancing/contestants/mark_index.shtml

சோனியில் இது போல ஏதோ ஒரு நிகழ்ச்சி இருப்பதாகவும் அதில் அஜய் ஜடேஜா கலந்து கொள்வதாகவும் NDTVயில் பேசிக் கொண்டார்கள். எப்படி இருக்கிறது அந்த நிகழ்ச்சி?